2020-nji ýylyň dekabr aýynyň 8-ne Ysraýyl döwletiniň Ariel uniwersitetiniň gurnamagynda matematika dersi boýunça 14-nji Halkara açyk olimpiadasy “Zoom” we “Moodle” platformalarynyň üsti bilen göni wideoaragatnaşykda (onlaýnda) geçirildi. Bu Halkara açyk olimpiadasy 2 görnüşde (“Blitz” we “Championship”) geçirildi. Oňa Türkmenistanyň, Ysraýylyň, Rumyniýanyň, Russiýa Federasiýasynyň, Polşanyň we beýleki döwletleriň ýokary okuw mekdeplerinden jemi 400-e golaý talyplar gatnaşdy. Bu Halkara açyk olimpiadasynyň “Blitz” (soraglary çalt çözmek) görnüşinde Türkmen döwlet binagärlik-gurluşyk institutynyň Ykdysadyýet we dolandyryş fakultetiniň 2-nji ýyl talyby Kadyrberdi Annabaýew we şol fakultetiň 3-nji ýyl talyby Jepbar Askarow altyn medala mynasyp boldular. Bu bäsleşigiň “Championship” görnüşinde institutyň Ykdysadyýet we dolandyryş fakultetiniň 3-nji ýyl talyby Jepbar Askarow 107 ball, şol fakultetiň 2-nji ýyl talyby Kadyrberdi Annabaýew 101 ball jemläp, kümüş medala mynasyp boldular.