2025-nji ýylyň 24-25-nji noýabr aralygynda Arkadagly Gahryman Serdarymyz Gazagystan Respublikasyna iş saparyny amala aşyrdy. Bu saparyň many-mazmuny, türkmen-gazak hyzmatdaşlygynyň dürli ugurlar boýunça üstünlikli ösdürilýändigi dogrusynda Türkmen döwlet binagärlik-gurluşyk instituty, Türkmenistanyň Demokratik partiýasynyň Aşgabat şäher komiteti we Miras teleýaýlymy bilen bilelikde syýasy gepleşik gurnaldy. Bu syýasy gepleşikde Türkmen döwlet binagärlik-gurluşyk institutynyň mugallymlary Kümüş Allabaýewa, Batyr Nowruzow, Hojadurdy Hojadurdyýew we Türkmenistanyň Demokratik partiýasynyň Aşgabat şäher komitetiniň işgäri Gülsoltan Şallyýewa dagy çykyş etdiler. Çykyş edenleriň her biri Türkmenistan bilen Gazagystanyň arasynda yzygiderli amala aşyrylýan ýokary derejedäki özara saparlar we duşuşyklar türkmen gazak dostluk we ynsanperwer gatnaşyklary, şeýle hem 1992-nji ýyldan bäri ýola goýlan diplomatik gatnaşyklary, BMG-niň çäklerinde netijeli özara oňyn hyzmatdaşlygy barada giňişleýin gürrüň etdiler. Şu ýylyň iýulynda Astanada Magtymguly Pyragynyň ýadygärliginiň açylmagy, şol sanda Aşgabatda meşhur gazak şahyry Abaý Kunanbaýewiň heýkeliniň açylmagy doganlyk halklarymyzyň çuňňur medeni-ruhy gatnaşyklarynyň aýdyň güwäsidir. Hormatly Prezidentimiziň Gazagystan döwletine eden sapary dogrusyndaky bu syýasy gepleşik Miras teleýaýlymy tarapyndan ýaýlyma berildi.
Ilaman Myradow,
Türkmen döwlet binagärlik-gurluşyk institutynyň
Demokratik partiýasynyň ilkinji guramasynyň başlygy
