Türkmen döwlet binagärlik-gurluşyk instituty öz gözbaşyny öňki 1963-nji ýylyň 1-nji sentýabrynda döredilen Türkmen politehniki institutyndan alyp gaýdýar. 2012-nji ýylyň maý aýynyň 25-ne Türkmen politehniki instituty ýapylyp, täze ýokary okuw mekdebi, ýagny Türkmen döwlet binagärlik-gurluşyk instituty döredilýär. Türkmen döwlet binagärlik-gurluşyk instituty ýaş, häzirki zaman ylmy we taslama bilim edarasydyr. Türkmen döwlet binagärlik-gurluşyk instituty Türkmenistanyň Gurluşyk we senagat toplumynyň ministrlikleri we pudaklaýyn dolandyryş edaralary üçin ýokary derejeli hünärmenleri taýýarlaýar.
Türkmen döwlet binagärlik-gurluşyk institutyň düzümine Okuw-gurluşyk merkezi, häzirki zaman enjamlary we maşynlary bilen enjamlaşdyrylan Türkmen-hindi okuw-önümçilik merkezi, muzeý, 3 sany umumy ýaşaýyş jaýy, naharhana we stadion girýär. Häzirki wagtda institutda 8 fakultet we 28 kafedra hereket edýär we 4630 sany talyp 10 ugur we 34 hünär boýunça döwrüň talabyna laýyklykda bilim alýarlar. Bakalawr maksatnamasynyň 7 sany ugry boýunça 13 sany taýýarlygyň ugrundan bakalawrlar taýýarlanýar. Institut Türkmenistanyň döwlet we hususy eýeçilikdäki edaralary we kärhanalary üçin ýöriteleşdirilen ugurlar boýunça hünärmenleri taýýarlaýar we her ýylda 750-dan gowrak ýokary bilimli hünärmenleri goýberýär. Türkmen döwlet binagärlik-gurluşyk instituty dünýäniň öňdebaryjy uniwersitetleri bilen ylym we bilim ulgamynda halkara gatnaşyklary saklaýar. “Türkmenistanda sanly bilim ulgamyny ösdürmegiň Konsepsiýasyna” salgylanyp, institut 10 ugur boýunça hünärmenleri taýýarlaýar:
Türkmenistanyň Prezidentiniň Karary bilen tassyklanan “Türkmenistanda sanly bilim ulgamyny ösdürmegiň Konsepsiýasyny durmuşa geçirmegiň” meýilnamasyna laýyklykda institutda içki lokal tory döredildi. Onuň esasynda institutyň Bilim portaly döredilip, bellenilen formatlar boýunça elektron resminamalar, okuw kitaplary, gollanmalary we professor-mugallymlaryň umumy okuw, amaly we tejribe sapaklarynyň audio we wideo ýazgylary, Gurluşyk we senagat toplumynyň ministrlikleriniň we pudaklaýyn dolandyryş edaralarynyň önümçiligini açyp görkezýän wideorolikler ýerleşdirilen. Türkmenistanyň Hormatly Prezidentiniň tabşyryklaryndan ugur alyp, Türkmen döwlet binagärlik-gurluşyk institutynyň ähli bölümlerinde elektron resminama dolanyşygy ýola goýuldy. Türkmenistanyň Gurluşyk we senagat toplumynda işleýän hünärmenleriň hünär derejelerini ýokarlandyrmak üçin institutda Hünär derejesini ýokarlandyrmak fakulteti hereket edýär.
Institutyň maddy-enjamlaýyn binýady we ýokary hünär derejeli professor-mugallymlar düzümi, ýokary hilli we häzirki zaman bilim bermeklige mümkinçilikler döredýär. Türkmen döwlet binagärlik-gurluşyk institutyň talyplary her ýylda Türkmenistanyň Gurluşyk we senagat toplumynyň pudaklaýyn dolandyryş edaralarynda we kärhanalarynda okuw-tanyşlyk, taslama, tejribe-konstruktorçylyk, önümçilik we diplomyň öň ýanyndaky tejribeliklerini geçýärler. Ylmy-barlag, taslama, tejribe-konstruktorçylyk işlerini bilelikde alyp barmak üçin Türkmenistanyň Ylymlar akademiýasynda, Türkmenistanyň Ministrliklerinde we pudaklaýyn dolandyryş edaralarynda we kärhanalarynda Türkmen döwlet binagärlik-gurluşyk institutynda binýatlyk kafedralary hereket edýär.
