2025-nji ýylyň 26-njy noýabrynda Ýagşygeldi Kakaýew adyndaky Halkara nebit we gaz uniwersitetinde “Sanly innowasion tehnologiýalaryň geljegi we ylym-bilim ulgamyna ornaşdyrylyşy” atly utgaşykly görnüşde halkara ylmy-amaly maslahat geçirildi. Bu halkara ylmy-amaly maslahaty 3 bölümçede öz işini dowam etdirdi, 1-nji bölümçe “Bilim ulgamynda sanlylaşdyrma we sanly tehnologiýalar”, 2-nji bölümçe “Kiberhowpsuzlyk we emeli aň”, 3-nji bölümçe “Durnukly ösüş maksatlaryna ýetmekde sanly ykdysadyýetiň orny” diýlip atlandyryldy.
Halkara ylmy-amaly maslahatda dünýäniň abraýly ýokary okuw mekdeplerinden hünärmenler, şeýle hem nebit-gaz ulgamyna degişli Türkmenistanyň we daşary ýurtlaryň kompaniýalaryndan wekiller gatnaşdylar. Biziň Türkmen döwlet binagärlik-gurluşyk institutymyzdan “Diller” kafedrasynyň uly mugallymy Kümüş Allabaýewa “Daşary ýurt dillerini okatmakda innowasion usullaryň aýratynlyklary” tema bilen, şeýle hem “Komýuter tehnologiýasy we ulgamlary” kafedrasynyň mugallymy Jeňňelowa Güljemal “Akylly öý tehnologiýasy we häzirki zaman innowasion ulgamlaryň jemgyýete täsiri” atly tema bilen 3-nji bölümçede iňlis we rus dillerinde çykyş etdiler. Bu halkara ylmy-amaly maslahat örän täsirli bolup, sanly innowasion tehnologiýalary we emeli aňy ulanmagyň halkara tejribesi, sanly innowasion tehnologiýalaryň ylym-bilim ulgamyna we önümçilige ornaşdyrylyşy, umuman sanly bilim ulgamynda ýetilen sepgitler barada özara pikir alyşmaga giň mümkinçilik boldy.
Kümüş Allabaýewa,
Türkmen döwlet binagärlik-gurluşyk institutynyň
“Diller” kafedrasynyň uly mugallymy
