TDBGI

  1. Baş sahypa
  2. Täzelikler

Türkmen döwlet binagärlik-gurluşyk instituty "Aşgabat – milli binagärligiň merjeni, ylym-bilimiň mesgeni" atly halkara ylmy-amaly onlaýn maslahaty geçirýär

Second slide
2025-04-26 917

Hormatly kärdeşler!


Türkmen döwlet binagärlik-gurluşyk instituty, Sizi 2025-nji ýylyň 21-nji maýynda sanly ulgam arkaly geçiriljek "Aşgabat – milli binagärligiň merjeni, ylym-bilimiň mesgeni" atly halkara ylmy-amaly maslahata gatnaşmaga çagyrýar. Ylmy-amaly maslahatyň resmi dili: türkmen, rus we iňlis dilleri.

Maslahatyň maksady – binagärlik-gurluşyk ulgamynda alnyp barylýan häzirki zaman ylmy barlaglaryň, tehnologik innowasiýalaryň we tejribeleriň paýlaşylmagydyr.

Maslahatda çykyş etmek üçin hödürlenýän mowzuklar aşakdaky ugurlary öz içine alýar:

  • Binagärlik, dizaýn, şähergurluşyk we sanly tehnologiýalaryň ornaşdyrylmagy;
  • Gurluşyk tehnikasy we tehnologiki çözgütler (senagat we ýaşaýyş jaý gurluşygy, ýol-ulag infrastrukturasy, gurluşyk materiallary, konstruksiýalary, täze gurluşyk önümleri we tehnologiýalary, seýsmiki durnuklylyk meseleleri);
  • Ekologiýa, durmuş howpsuzlygy;
  • Energetika we elektrik üpjünçiligi;
  • Alternatiw energiýa çeşmeleriniň gurluşykda ulanylmagy;
  • Gurluşyk ykdysadyýeti, dolandyryş strategiýalary we logistika ulgamyndaky häzirki zaman çemeleşmeler;
  • Organiki däl maddalaryň himiki tehnologiýasy.

Maslahata gatnaşmak isleýän alymlardan, inžener-hünärmenlerden we ylmy-tehniki jemgyýetçiligiň wekillerinden öz çykyşlaryny we degişli resminamalary görkezilen tertiplere laýyklykda tabşyrmak haýyş edilýär.

Aşgabat-milli binagärligiň merjeni, ylym-bilimiň mesgeni” atly sanly ulgam arkaly halkara ylmy-amaly maslahata gatnaşmagyň
Ş E R T L E R I

  1. Halkara ylmy-amaly maslahata gatnaşmaga isleg bildirýänleriň maslahata tabşyrylan tezisleriň awtorlary üçden köp bolmaly däldir. Işiň mazmuny özbaşdak ylmy-barlag häsiýetli we ady bilen kybapdaş bolmaly.
  2. Halkara ylmy-amaly maslahata gatnaşmak üçin hasaba alnyş görnüşi doldurylmaly (adaty şrift, Times New Roman, 12 pt):

Türkmenistanly halkara ylmy-amaly maslahata gatnaşyjylary hasaba alnyş görnüşi (daşary ýurtly gatnaşyjylar üçin)

Familiýasy

  

Ady

  

Atasynyň ady

  

Wezipesi

  

Alymlyk derejesi, ady

  

Işleýän ýeriniň doly ady

  

Işleýän ýeriniň salgysy (poçta

indeksini hem görkezmeli)

  

Iş telefony, elektron salgysy

  

Nutugyň ady (baş harplar bilen ýazmaly däl)

  

Nutugyň tematiki ugry

  

Nutuk haýsy dilde taýýarlandy

  
  1. Halkara ylmy-amaly maslahata gatnaşmak üçin gysgaça beýany (tezis) we annotasiýalary taýýarlanylmaly. Nutugyň gysgaça beýany ylmy-amaly maslahatyň iş dilleriniň birinde, annotasiýalar bolsa beýleki iki dilde bolmaly.
  • Halkara ylmy-amaly maslahata daşary ýurtly gatnaşyjylaryň nutuklarynyň annotasiýalarynyň türkmen diline terjimesi Guramaçylyk topary tarapyndan ýerine ýetiriler.
  • Halkara ylmy-amaly maslahata ýerli gatnaşyjylar annotasiýanyň iňlis we rus dillerine terjimelerini ýokary okuw mekdepleriniň degişli kafedralarynda ýa-da terjime edaralarynda tassyklatmaly.
  1. Halkara ylmy-amaly maslahata gatnaşyjylaryň ylmy işiniň gysgaça beýany we annotasiýalar awtoryň işleýän edarasynda seredilmeli we edaranyň ýolbaşçysy tarapyndan gol çekilen hat üsti bilen iberilmeli. Hata nutugyň gysgaça beýanynyň we annotasiýalaryň elektron görnüşleri goşulmaly.
  2. Iberilen resminamalaryň mazmunyna awtorlar şahsy jogapkärçilik çekýärler.

    Nutuklaryň gysgaça beýanlaryna we annotasiýalaryna bildirilýän

T A L A P L A R

  1. Halkara ylmy-amaly maslahata gatnaşmak üçin gysgaça beýanlaryny we annotasiýalary guramaçylyk komitetine ibermegiňizi haýyş edýäris (gysgaça beýanynyň möçberi A4 (210×297 mm) formatda 1,5 sahypadan geçmeli däl, annotasiýalaryň her biriniň (iňlis we rus dillerinde) möçberi 0,5 sahypa çenli bolmaly.
  2. Sahypa ölçegleri: ýokary we aşak taraplarda – 2,0 sm, çep tarapda – 2,5 sm, sag tarapda – 1,5 sm. Oriýentasiýasy – “kitap” görnüşli, şrifti – Times New Roman, ölçegi – 14 pt, setir arasy – 1.
  3. Ylmy işiň aýratynlyklaryna baglylykda nutugy şekiller, formulalar we tablisalar görnüşinde beýan etmäge ýol berilýär. Bu ýagdaýda her bir şekil sahypanyň görkezilen ölçeglerinden çykmaly däl, şrifti bolsa 14-den kiçi bolmaly däl. Nutugyň gysgaça beýanynyň umumy göwrümi şekiller, formulalar we tablisalar bilen bilelikde A4 formatdaky 1,5 sahypadan geçmeli däl.
  4. Maslahata elektron görnüşde tabşyrylýan ähli materiallar diňe Word for Windows formatynda kabul edilýär (doc we docx giňeltmesi bilen).
  5. Nutugyň gysgaça beýany we annotasiýalar bir faýlda saklanylmaly hem-de aşakdaky görnüşde bolmaly:
  • awtoryň ady, familiýasy sahypanyň sag gyrasy boýunça deňlemek bilen 14-lik şriftde setir harplar bilen goýy gara ýazylmaly, döwletiň ady ýaýyň içinde görkezilmeli;
  • eger nutugyň iki awtory bar bolsa, ilki çykyş edýäniň ady, familiýasy görkezilmeli;
  • gysgaça beýanyň we annotasiýalaryň atlary baş harplar bilen 16-lyk şriftde goýy gara görnüşde ýazylmaly we setiriň merkezi boýunça deňlenilmeli;
  • nutugyň gysgaça beýanynyň tekstini ýazmazdan öň 1 setir goýbermeli.
  1. Nutugyň gysgaça beýanynyň we annotasiýalaryň tekstleri setiriň ini boýunça deňlenilmeli. Matematiki formulalar degişli formula redaktorlarynyň kömegi bilen ýazylmaly.
  2. Nutugyň gysgaça beýanynyň we annotasiýalarynyň sahypalary belgilenilmeýär.
  3. Bildirilýän talaplara laýyk gelmeýän işlere garalmaýar.
  4. Iş tabşyrylandan soňra hödürlenilen düzedişler we goşundylar kabul edilmeýär.
  5. Guramaçylyk toparynyň karary boýunça iş ylmy-amaly maslahata goýberilmän bilner.
  6. Tabşyrylan resminamalar yzyna gaýtarylmaýar.
  7. Nutugyň gysgaça beýany we annotasiýalar bir faýlyň içinde ýerleşdirilmeli. Faýlyň ady çykyş edýäniň familiýasyny, adyny, atasynyň adyny we “tez” diýen harplary özünde jemlemeli. Mysal üçin, çykyş edýän – Amanow Myrat, faýlyň ady – “Amanow M. tez”. Nutuk aýratyn faýlda iberilmeli.
  8. Hasaba alnyş görnüşleri nutugyň ähli awtorlary tarapyndan doldurylýar we bir faýlda ýerleşdirilýär. Ilki bilen ylmy-amaly maslahatda çykyş edýäniň, soňra awtordaşyň hasaba alnyş görnüşleri ýerleşdirilýär. Hasaba alnyş maglumaty üçin faýlyň ady awtoryň familiýasyny, adyny, atasynyň adyny we “reg” diýen harplary özünde jemlemeli. Mysal üçin, “Amanow M. reg”.
  9. Faýllary arhiwirlemeli däl!

Habarlaşmak üçin:    Türkmen döwlet binagärlik-gurluşyk instituty
                                    tel: (+99312) 28-18-03; (+99312) 28-18-04;  
                                    faks: (+99312) 28-18-01
                                    elektron poçta: tsaci.conferens@gmail.com; ylym.tdbgi@gmail.com; 

Halkara maslahata gatnaşmaga isleg bildirýänler öz tezislerini we annotasiýalaryny (kagyz we elektron görnüşinde) 2025-nji ýylyň 7-nji maýyna  çenli ibermegiňizi haýyş edýäris.

Guramaçylyk topary